Jeti mıllıondyq páter! Astanadan dál osyndaı baǵaǵa baspana alýǵa bolady. Bul shenenýinikterdiń sózi. Onymen qosa, kúni keshe ǵana «7-20-25» baǵdarlamasy aıasynda elimizdiń memlekettik qyzmetkerlerine 1 mıllon teńge kóleminde sertıfıkattar taratylmaq. Aqshalaı sertıfıkattar bújdettik sala qyzmetkerleri úshin alǵashqy jarnany jeńildetý úshin ázirlengen. Ol úshin jergilikti atqarýshy organdar keminde 50 mıllıon teńge kóleminde aqsha bólýi tıis. Bul týraly Eýrazıa birinshi arnasy habarlaıdy.
Bes jyldan beri jyljymaıtyn múlik satýmen aınalysyp júrgen Ǵarıfolla Qonys elordanyń árbir aýdanyn búge-shúgesine deıin biledi. Tipti, naryqtaǵy baǵany bes saýsaǵyndaı jattap alǵan. Rıeltordyń aıtýynsha, sońǵy 5 jylda bas qaladaǵy páter baǵasy áldeqaıda ósken. Satyp alýshalardyń da qatary sırepti.
2013-2014-pen salystyrǵanda 2018 jyly baǵa 12 paıyzǵa kóterildi. Bul bir bólmeli páterlerdiń kóterilgendigi. Sol jaǵalaýdan 14-15 mln, bir bólmeli, 40 sharshy metr páterdi alýǵa bolady. Al endi oń jaǵalaýǵa ótetin bolsaq, ol raıonyna baılanysty. Baıqońyr, Saryarqa aýdandarynda 8-9 mln bastalady. Almaty aýdanynda 10-11 mln teńge kóleminde» - deıdi rıeltor Ǵarıfolla Qonys.
Sol 15 mıllıondyq páterdiń birin alǵan Jupar Ahmetova jýyrda ǵana qonys toıyn toılaǵan. Qalanyń qaq ortasynda ornalasqan baspanany uzaq izdepti. Kóńilinen shyqqany osy. 39 sharshy metrlik páter. Al jeti mıllıonǵa tabýǵa bola ma degenimizde....
«Joq, ondaı baǵa joq múldem. Ondaı bolsa, eki páter satyp alyp otyrmaımyn ba. Ózim qurylys kompanıasynda jumys istegendikten, kóp páterlerdi bárin salystyryp, barlyǵynyń artyqshylyǵyn-kemshiligin bilgendikten, osy baǵaǵa, osy raıonda alǵanyma qýanyshtymyn. Sebebi, meniń oıymsha, maǵan arzan páter jolyqty» - deıdi qala turǵyny Jupar Ahmetova.
Degenmen Memleket basshysynyń aldynda shimirikpeı 7 mıllıon turmaq 3 mıllıonǵa páter alýǵa bolady degen joǵary laýazymdy sheneýnikter áli de aıtqanynan taımaǵan. El ekonomıkasynyń tutqasyn ustap otyrǵan mınıstrlerdiń ózi naryqtaǵy ahýaldan beıhabar syńaıly.
- Astanada 7 mln-ǵa úı alýǵa bola ma?
-7 mln-ǵa, bar shyǵar, baǵasyna qaraǵanda, - deıdi Premer-Mınıstrdiń orynbasary Erbolat Dosaev.
- 7 mln-ǵa Astanada úı bar bizde qazir?
- 7 mln-ǵa? Árıne, bar.
- Astanada?
- Astanada odnokomnatnyı bar, - deıdi QR Ulttyq ekonomıka mınıstri Tımýr Súleımenov.
Alaıda Astananyń 4 aýdanynan sharq uryp izdep, 7 mıllıon turatyn páter izdep tappadyq. Tek qaladan tys jerden izdesti.
Astanadan 15 shaqyrym jerde ornalasqan «Lesnaıa polána » turǵyn úı alabynan 7 mıllıonǵa satylatyn úı taptyq. Ol qandaı baspana? Onyń sharshy metri qansha, birge kóreıik!
Qosshy aýylyna qaraıtyn shaǵyn aýdandaǵy qýystaı bólmeniń ózi 7 mıllıonnan bastalady. As bólmesi men qonaq úıi de osy. Páter qojaıynyń sózinshe, bul baǵa eń tıimdi. Sebebi naryqta mundaı somadaǵy úıdiń sapasy syn kótermeıdi.
«25,8 kv metrov za 7 mıllonov.. Men 25,8 sharshy metrlik páterimdi 7 mıllıon teńgege satyp jatyrmyn. Al negizinde baǵa 11 mıllıon teńgeden bastalady. Qazir satyp alýshylar az. Al negizinde qaladan mundaı baǵada úı alý múmkin emes» - deıdi qala turǵyny Pavel Gráznov.
Al halyqty qoljetimdi baspanamen qamtýy tıis "7-20-25" baǵdarlamasy da Elbasynyń synyna ushyraǵany belgili. Sebebi, baǵdarlama aıasynda tek 2000 ǵana ótinishi qabyldanǵan. Máseleni tez arada sheshpek bolǵan atqaminerler nebári 2-3 kúnniń ishinde pılottyq jańa jobany ázirledi. Ipotekalyq uıymnyń málimetinshe, 50 myń bújettik qyzmetkerlerge jyl sońyna deıin 1 mıllıon teńgeden sertıfıkattar taratylmaq. Ol qaıtarymsyz jáne nesıe retinde beriledi.
«Bul jerdegi bizdiń jergilikti ákimshilikter sheshetin bolady. Qaı jerde berilip, qaı ýaqytta qaıtarylatynyn. Bul jerde bizdiń usynysymyz boıynsha eki joba bar. Birinshisi qaıtpaıtyn kómek retinde beriledi. Ekinshisi uzaq merzimdi nesıe paıyzsyz, qaıtarylymy bar, nesıe retinde beriledi. Memlekettik qyzmetkerler degen emes, ózimizdiń Elbasymyzdyń aıtqany boıynsha bul sertıfıkattardy muǵalimder, dárigerler, polısıalar jáne de áleýmettik salada isteıtin kisilerge» - deıdi memlekettik ıpotekalyq uıymynyń basshysy Qaırat Altynbekova.
Qalaı desek te, sońǵy eki aıda elimizdiń úsh qalasynda úıdiń baǵasy kúrt qymbattaǵan. Oǵan qosa, úıdi satyp alýshylar men satýshylardyń da qatary azaıypty. Máselen, statısıka komıtetiniń málimetinshe, bir jyldyń ózinde Astanada kelisimderiniń sany 2,4 %, Almatyda 12 paıyzǵa deıin qysqarǵan. Al mamandardyń sózinshe turǵyn úıdiń baǵasy munymen toqtamaıdy.
